Шансон замест року - новости на :::RockBy.Net:::
FM-этэр застаўся без англамоўнага року. 16 студзеня кіраўніцтва радыё "Рокс-М" зьмяніла свой фармат з "сур'ёзнай музыкі для дарослых" на "расейскі шансон". Варыянты беларускамоўнага фармату ці джаз-фармату і не разглядаліся.
"Рокс" фармаваў густы той часткі моладзі, якая аддавала перавагу англамоўнаму року перад расейскай папсой. Дзяжурная фраза "роксаўскага" ды-джэя ў адказ на слухацкую заяўку: "Алёну Апіну не паставім, паслухайце песьню гурту "Айрасьміт". Паводле слоў кіраўніцтва, зьмяніць фармат іх змусіў загад аб 75%-ным напаўненьні эфіру беларускай музыкай. На думку праграмнага дырэктара "Роксу" Зьмітра Аўсяньнікава, песьні "Лэд Зэпэлін" не спалучаюцца са сьпевамі Дарафеевай, што адбіваецца на якасьці эфіру і размывае аўдыторыю. Каб зрабіць этэр больш адэкватным, кіраўніцтва і вырашыла круціць Газманава.
"Рокс" сышоў ў бок "шансону", каб зьменшыць рызыкі і выжыць: "Аўдыторыя зьменіцца толькі якасна, колькасна застанецца такой жа", - марыць сп.Аўсяньнікаў. Гэта значыць 5% фанаў року зьменяць 5% аматараў Шуфуцінскага.Ці разглядала станцыя варыянты пераходу ў незанятыя нішу беларускамоўнага радыё (тут табе і 75% лёгка выканаць), джаз- ці клясык-радыё, якія існуюць у Маскве ці Вільні? Адказвае ды-джэй "Роксу" Адам Старповіч. "Станцыі джаз-накірунку стварыць цяжка. Бо ў Беларусі для такой станцыі ня знойдуцца рэклямадаўцы. Гэтак, аналягічная станцыя нядаўна збанкрутавала з Варшаве. Што да клясыкі, тое самае, - лічыць ды-джэй Старповіч. - На ягоную думку, мог бы існаваць у нас рок-н-рольны фармат".На пытаньне, чаму магчымасьць пераходу ў незанятую нішу беларускамоўнага радыё нават не разглядалася, частковы адказ можна знайсьці ў тым, хто ўласьнік "Роксу". "Расейскае радыё" і "Рокс" маюць аднаго кіраўніка і адзіную інфармацыйную службу.Цікавая карціна на "роксаўскім" форуме, дзе сталыя прыхільнікі радыёстанцыі разьвітваюцца зь любімымі ды-джэямі і праграмамі.
Адзін з буйных рэклямадаўцаў, які ўжо пяць год працуе з "Роксам", таксама разьвітаўся з гэтым радыё (як ён мне растлумачыў, "з прычыны непрадказальнасьці новай аўдыторыі"). Ходзяць чуткі пра сыход і некаторых ды-джэяў.Пытаньне вызначэньня фармату стаіць цяпер перад усімі пятнаццацьцю FM-станцыямі. Усе топчуцца на адной дзялянцы, і, здаецца, ніхто з радыйнікаў не ўсьведамляе, што выйсьце - і ў творчым, і ў камэрцыйным пляне - магло б быць у пераходзе на нейкі новы, незаняты фармат. Але ж гэта культурнае наватарства, і ніхто ня хоча рызыкаваць. Для беларускіх музыкаў зьмена фармату "Рокса" таксама сталася вялікай нечаканкай. Канстанцін Драпеза (дуэт "Аляксандра і Канстанцін") кажа, што ён вельмі засмучаны такой кардынальнай зьменай: "Толькі на "Роксе" можна было пачуць сапраўдную музыку", і для мяне асабіста, у некаторай ступені, эта радыёстанцыя была музычнай школай. Не разумею, навошта сыходзіць з правільна абранага шляху". Аляксей Шадзько, песьні якога часьцком гучаць на хвалі 102,1, лічыць, што ў сувязі з абавязкамі запаўняць этэр на тры чвэрці беларускай музыкай, з замежнай папросту стала невыгодна працаваць. Зьнікнеьне з этэру прадуктаў заходняй культуры, музыка і актор параўноўвае з тым, што нечакана тэатры вырашаць не ставіць пастаноўкі замежных драматургаў ці з паліцаў кнігарняў зьнікнуць кнігі замежных пісьменьнікаў: "Уяўляеце, што будзе ў такім выпадку?", - рытарычна пытае Шадзько. Нечаканасьцю навіна пра перамены на "Роксе" сталася і для Аляксандра Памідорава: "Мой прыймач заўсёды настроены на хвалю 102,1. У нядзелю мы сьвяткавалі дзень нараджэньня маёй дачкі, і я па звычцы уключыў радыё "Рокс"...І мяне апанавала агіда, ад нізкаякаснай расейскай папсы, якую я там на сваё дзіва пачуў". Песьні Ігара Варашкевіча і "Крамы" таксама актыўна ратаваліся да нядаўняга часу на "Роксе": "Калі я гляджу навіны, то ўключаю НТБ, калі слухаю музыку на радыё - аддаю перавагу "Роксу". Гэта станцыя мела свой твар, які, на жаль, вырашыла сьвядома згубіць". Уладзімер Пучаг лідэр групы "J-Морс" спадзяецца, што гэта часовае зьмяненьне фармату: "Беларуская музыка актыўна разьвіваецца і, мяркую, што хутка "Рокс" вернецца да свайго фармату. Мусіць жа быць хоць адна рокавая станцыя ў нашай FМ-прасторы!". Аднак кіраўніцтва радыё "Рокс" настроена меней аптымістычна. Праграмны дырэктар радыёстанцыі Зьміцер Аўсяньнікаў кажа пра немагчымасьць вяртаньня да старога фармату, покуль будуць існаваць абмежаваньні ў ратыцыі музыкі. Па матэрыялах music.fromby.net
|
