Неафашысты пачалi рэзаць. Мiлiцыя за гэтым назiрала - новости на :::RockBy.Net:::

Неафашысты пачалi рэзаць. Мiлiцыя за гэтым назiрала

 
Два чалавекi з нажавымi раненнямi дастаўлены ў шпiталь хуткай дапамогi. Такi вынiк нападзення неанацыстаў на рок-канцэрт, якi 16 сакавiка адбываўся ў Менску. Учора ў менскiм клубе “Леа”, што знаходзiцца ля парка Чэлюскiнцаў, адбываўся альтэрнатыўны рок-канцэрт. У апошнiя гады такiя мерапрыемствы дастаткова часта заканчваюцца бойкамi.

– Фактычна, у Менску iдзе вайна. З аднаго боку фашысты, з другога – альтэрнатыўная моладзь, – распавядае Насця Н., якая неаднойчы арганiзоўвала рок-канцэрты ў Менску.

Так адбылося i на гэты раз.

– Яшчэ да пачатку канцэрта да арганiзатараў падышлi мiлiцыянты ў цывiльным i паведамiлi, што чакаецца нападзенне фашыстаў на клуб, – распавядае адзiн з удзельнiкаў рок-канцэрта ў клубе “Леа” Дзянiс Б.

I сапраўды, напрыканцы канцэрта групоўка маладых людзей у чорных куртках здзейснiла нападзенне на моладзь, што была ля будынка, у якiм знаходзiцца клуб.

– Нацысты былi ўзброены каламi i нажамi. У вынiку, два хлопцы атрымалi нажавыя раны. Гэта адбылося на вачах супрацоўнiкаў мiлiцыi, якiя праз дарогу назiралi за бойкай, – распавядае Дзянiс Б.

Як высветлiла ПАГОНЯ, адзiн з пацярпелых, Арцём Кацеў, знаходзiцца ў шпiталi хуткай дапамогi. Ён атрымаў нажавое раненне ў жывот, але яго жыццю нiчога не пагражае. Урачы ацэньваюць ягоны стан, як задавальняючы. Другi пацярпелы атрымаў удар нажом у плечы. Яго жыццю таксама няма пагрозы.

– Нацысты атакуюць рок-канцэрты, таму што альтэрнатыўная моладзь заўсёды выступае супраць расiзма i нацызма. Мiлiцыя пра гэта добра ведае, але не хоча гэтага заўважаць, – гаворыць галоўны рэдактар моладзевай газеты “Навiнкi” Паўлюк Канавальчык.

На яго думку, адсутнасць рэакцыi з боку мiлiцыi на выхадкi неанацыстаў вядзе да ўсё большай радыкалiзацыi вулiчнай барацьбы. Прычым як з аднаго, так i з другога боку. Прычыны адсутнасцi рэакцыi ўладаў на дзейнасць неанацыстаў, на яго думку, маюць iдэалагiчную глебу.

– Напярэдаднi святкавання 60-годдзя перамогi ў краiне працягваюць дзейнiчаць неанацысцкiя групоўкi. Якiя, дарэчы, таксама рыхтуюцца да гэтай даты. Гэта сведчыць пра тое, што нацызм у нашай краiне не пераможаны. Магчыма таму ўлады спрабуюць гэта не заўважаць, – лiчыць Канавальчык.
      Новости в тему:
      Error in SQL